மென்மையான பாதம்!!

பெண்கள் தங்கள் முகத்தை பராமரிக்க செலவிடும் நேரத்தில் சில நிமிடங்கள் கூட, தங்கள் பாதங்களை கவனிக்க செலவு செய்வதில்லை. பெரும்பான்மையான பெண்களுக்கு பாதங்களில் ஏற்படும் பிரச்சினை பித்த வெடிப்பு. என்ன மருந்து போட்டாலும், இந்த பித்த வெடிப்பு மட்டும் மாற மறுக்கிறதே என்று அலுத்துக் கொள்பவர்கள் ஏராளம்.

பித்தவெடிப்பு குணமடைய குறிப்புகள்:

1. பப்பாளி பழத்தை நன்கு நைசாக அரைத்து, அதை பாதங்களில் வெடிப்பு உள்ள பகுதிகளில் தேய்க்க வேண்டும். அவை உலர்ந்ததும், பாதத்தை தண்ணீரில் நனைத்து தேய்க்க வேண்டும். இவ்வாறு தொடர்ந்து செய்து வந்தால், பித்த வெடிப்பு குணமாகும்.

2. மருதாணி இலைகளை நன்றாக அரைத்து, பித்த வெடிப்பு உள்ள இடங்களில் தேய்த்து உலர விட வேண்டும். பின், தண்ணீரால் கழுவ வேண்டும். இவ்வாறு செய்து வந்தால், நாளடைவில் பித்த வெடிப்பு குணமாகும்.

3. கால் தாங்குமளவுக்கு தண்ணீர் சூடுபடுத்தி, அதில் சிறிது உப்பு மற்றும் எலுமிச்சை சாறு சேர்க்க வேண்டும். அந்த தண்ணீரில் பாதத்தை சிறிது நேரம் வைத்து இருந்து, பின், ஸ்கிராப் போன்ற சொரசொரப்பானவற்றால் தேய்த்து கழுவினால் பாதத்தில் காணப்படும் கெட்ட செல்கள் உதிர்ந்து விடும். அதனால் பித்த வெடிப்பு ஏற்படுவதும் தடுக்கப்படுவதோடு, பாதம் மென்மையாகவும் இருக்கும்.

4. வேப்பிலை, மஞ்சள் ஆகியற்றுடன் சிறிது சுண்ணாம்பு சேர்த்து அரைக்க வேண்டும். இந்த கலவையில் விளக்கெண்ணெய் சேர்த்து, பித வெடிப்பு உள்ள இடங்களில் பூசினால், பித்த வெடிப்பு குணமாகும்.

5. தரம் குறைவான காலணிகளைப் பயன்படுத்துவதாலும் சிலருக்குப் பித்த வெடிப்பு ஏற்படும். எனவே காலணிகளை வாங்கும் போது விலை மற்றும் டிசைனைக் கருத்தில் கொள்ளாமல், தரமானது தானா என்பதைக் கவனித்து வாங்குவது நல்லது.

6. விளக்கெண்ணெய், தேங்காய் எண்ணெய் ஆகியவற்றை சம அளவில் எடுத்துக் கொள்ள வேண்டும். இதில் சிறிது மஞ்சள் தூளை கலந்து பேஸ்ட் போல குழைத்து, அதை பாத்தில் வெடிப்புள்ள இடங்களில் தடவி சிறிது நேரம் கழித்து கழுவ வேண்டும். இவ்வாறு செய்வதால், பித்த வெடிப்புக் குணமாகும்.

7. வேப்ப எண்ணெயில் சிறிதளவு மஞ்சள் பொடியை கலந்து பேஸ்ட் போல குழைத்து, பித்த வெடிப்பு உள்ள இடத்தில் தடவினால் பித்த வெடிப்பு குணமாகும்.

8. இரவு நேரத்தில் தூங்க போவதற்கு முன், காலை நன்றாக தேய்த்து கழுவி சிறிது தேங்காய் எண்ணெய் தேய்த்து தூங்கப் போகலாம். இப்படி தொடர்ந்து செய்வதால்,பித்த வெடிப்பு வராமல் தடுக்கலாம்.

9.குளித்து முடித்ததும் பாதங்களை ஈரமில்லதவாறு துணியால் துடைக்க வேண்டும். பின் பாதத்தில் சிறிது விளக்கெண்ணெய் தேய்த்து வந்தால் வெடிப்பு வராமல் தடுக்கலாம்.

You might also like