ஏமாறாதே, ஏமாற்றாதே!
ஏமாறாதே, ஏமாற்றாதே!
வடக்கு மாகாணத்தில் - குறிப்பாக யாழ்ப்பாணம் மாவட்டத்தில் அதிகளவான பண மோசடிச் சம்பவங்கள் அண்மைக்காலங்களில் நடந்திருக்கின்றன. இந்த மோசடிகள் லட்சங்களில் ஆரம்பித்து பல கோடிகள் வரையில் நீள்கின்றன. வெளிநாட்டுப் பயணம், காணி விற்பனை, இணையவழி ஏமாற்று, பகுதிநேர வேலை வாய்ப்பு என இந்த மோசடிகள் பல பரிணாமங்களில் நடந்தேறுகின்றன. ஏமாறுவோர் இருக்கும்வரையில் ஏமாற்றுவோர் இருக்கத் தான் செய்வார்கள். வடக்கில் யாழ்ப்பாணம் மாவட்டத்தில் நாளாந்தம் வெளியாகும் மோசடிச் சம்பவங்கள் பற்றிய செய்திகளைப் பார்க்கும்போது இவ்வாறுதான் எண்ணத் தோன்றுகின்றது. நேற்று முன்தினம் கூட தன்னை மருத்துவர் என்று அறிமுகப்படுத்திக் கொண்டு மோசடி செய்த குற்றச்சாட்டில் 29 வயது இளைஞர் ஒருவர் கைது செய்யப்பட்டிருக்கின்றார். அவரால் தயாரிக்கப்பட்ட போலி ஆவணங்களை நம்பி, கனடா நாட்டில் இருந்து சுமார் ஒன்ரறைக் கோடி ரூபா அவரது கணக்கில் வைப்பிலிடப்பட்டிருக்கின்றது. இவ்வாறு இன்னும் பலர் ஏமாற்றப்பட்டிருக்கலாம். இது ஒரு சமீபத்திய உதாரணம் மட்டுமே. இவ்வாறான பல மோசடிச் சம்பவங்கள் பதிவாகியிருக்கின்றன. இவ்வாறான மோசடிகள் தொடர்பாக பல எச்சரிக்கைகள் விழிப்புணர்வுத் தகவல்கள் பாதுகாப்புத் தரப்புகளாலும் ஊடகங்களாலும் வழங்கப்பட்டும் கூட மோசடியாளர்களிடம் சிக்கிக் கொள்வோர் குறைந்த பாடில்லை. இவ்வாறான மோசடிகளுக்கு முதற்காரணம் மனிதர்களின் பேராசையும் ஒரு காரணம் என்பதை ஒப்புக்கொள்ளவே வேண்டும். அதைப் பயன்படுத்தியே மோசடியாளர்கள் தங்கள் காரியத்தைக் கச்சிதமாக முடித்துக்கொள்கின்றனர். அதீத ஆசையால் மோசடியாளர்களின் கவர்ச்சி வார்த்தைகளுக்கு மயங்கி பணத்தைப் பறிகொடுக்கின்றனர். அதே நேரம் சமூக ஊடகங்களில் நாம் பார்ப்பது, படிப்பது அனைத்துமே உண்மை என்ற மனநிலை இன்றைய பொதுப்புத்தியில் ஏற்பட்டுக்கொண்டிருக்கிறது. அதையும் மோசடியாளர்கள் தங்களுக்குச் சாதகமாகப் பயன்படுத்திக் கொள்கின்றனர். மக்கள் மத்தியில் விழிப்புணர்வு ஏற்படும் வரையில் இவ்வாறான மோசடிகளைத் தடுப்பது இயலாத காரியமே. பொலிஸாரும், ஏனையோரும் மோசடியாளர்களைக் கைது செய்தாலும், ஏமாறுவோர் இருக்கும் வரையில் இவ்வாறான மோசடிகள் தொடர்ந்துகொண்டே இருக்கும். தொழில்நுட்பவளர்ச்சி உச்சம் கண்டுள்ள தற்காலத்தில் எவரும் எதையும் உருவாக்க முடியும் என்ற நிலைமையே இருக்கின்றது. மோசடியா ஏர்களால் கூறப்படும் விடயங்களை வழங்கப்படும் ஆவணங்களைச் சீர்தூக்கி ஆராய்ந்து பகுத்தறிந்து செயற்பட்டால் மட்டுமே மோசடியாளர்களிடம் இருந்து தப்பித்துக்கொள்ள முடியும். பணத்தை இழந்து விட்டு பின்னர் பொலிஸ் நிலையத்துக்கு அலைவதாலும் பொலிஸ் தரப்பைக் குறைகூறுவதாலும் எதுவும் நடந்துவிடப் போவதில்லை. குற்றவாளிகள் கைதுசெய்யப்பட்டாலும் இழந்த பணமோ பொருளோ மீண்டும் உடனே கிடைத்துவிடும் என்பதற்கும் எந்த உத்தரவாதமும் இல்லை. அதனால் சிந்தித்துச் செயற்படுவதே ஆபத்தில் இருந்து காக்கும். அதை உணர்ந்து மக்கள் செயற்படுவது மட்டுமே இவ்வாறான மோசடிகளில் இருந்து தப்பிப்பதற்கான ஒரே வழி.
#ஆசிரியர்_தலையங்கம் #வாசகர்கடிதம் #உதயன் #eelam #eelamnews #jaffnanews #uthayannews #recentnews #breaking

357 0

Leave a comment

தொடர்புடைய செய்திகள்

Advertisement


Contact Us

361, Kasthuriyar Road, Jaffna.

0771209996

admin@uthayan.com

Uthayan is a Sri Lankan daily newspaper that caters to the Tamil-speaking population. It is published by the esteemed New Uthayan Publication (Private) Limited, which is a constituent of the illustrious Uthayan Group of Newspapers. The newspaper was established in 1985 and operates from the city of Jaffna. It has a sister newspaper, Sudar Oli, which is headquartered in Colombo. Notably, Uthayan was the sole newspaper that continued its operations in Jaffna during the civil war. Unfortunately, the newspaper has faced numerous challenges, including repeated attacks, targeted killings of its personnel by paramilitary groups, and persistent threats.

Copyright © 2023 UTHAYAN All rights reserved.